Latest Mushaira…thodi noke jhonke..

My friend Lady Socrates started this Mushaira and the train of thought kept meandering…so here are the excerpts, hope you’ll enjoy…

Lady Socrates:Sardi hai gulaabi gulaabi

mausam sharaabi sharaabi

chardi hai khumaari khumaari

per kaam hai bhaari bhaari

Meenakshi Nigam Jhamb:

Kaam to rahega sadaa bhari

us pe kya umr gawani saari

tu bhi kabhie zindagi ka lele mazaa

arey ab to maan le baat hamari..

LS: agar teri baat maani

toh aayegi yaad naani

mera kaam karega kaun?

Tu, Tim, Harry ya Braun? :))))

MNJ: Arey jeena hai humney ek baar

Kaam to ayega baar baar

Kahin zindagi ghistey ghistey

Adhoori reh jayein na hasratein hazaar…!

LS: hasratein toh zindagi mein

aati jaati reheti hain har roz

har din eid ho nahin sakti

roza bhi hota kisi kisi roz

MNJ: Jashn karney walon ko

Kafir na karaar ker Dena

Sazaa ke dar se kahin

Rozon ki aadat na daal lena

LS: roze toh har gareeb ki hain ek aadat

kaam karna khuda ki hai ek ibaadat

har roz zindagi hai ek jashn-e-khaas

kyun ki abhi hai saans mein saans…..

MNJ: Phir to manati hogi tu

Lagaataar Jashn pe jashn

Jub jub karti hogi

Ram Dev ke Shwaas waley aasan

LS: Baba Ram Dev ki toh Ram hi jaane

woh toh hain ek khiladi bahut puraane

jis ne piya ho ghaat ghaat ka paani

woh hi hai aaj ka gyaani dhyaani :)))))))

MNJ: arey kaahey ka ab gyan dhyaan

jub satta ki ho pyaas

Rajniti ke thapedon mein

baba ki atak gayi saans..:)

LS: sanyasi koh satta se kya kaam

per sab koh chahiye paise aur naam

jo daraaye dhamkaaye woh kya baba

sab ek hain kya mandir kya kaba

MNJ:Ekmat hain hum is baat pe

Log ye kartey dikhawa khaali

Pole khulegi inki ek din

Chal de isi baat pe taali …

LS : taali toh mein bajaa doon

per dil keheta hai sazaa doon

dhongi log duniya chala rahen hain

paani mein ye aag laga rahen hain

MNJ: Fikr na ker ye kapti

Dheerey dheerey buhaarey jayengey

Gehoon mein se ye kankar

Ek ek karke nikaaley jayengey..

LS : aaj kal India mein safai abhiyaan

zor-shor se sab ki safai kar raha hai

jhaardu lagne lagi hai dhanush-baan

per kya vaakai koi farq pard raha hai? :)))))

MNJ :Kuch mat poochh hamari

dukh bhari yeh Gaatha

varna tu bhi sang royegi

pakad ke apna maatha

2 oct ko safai ki dulhan ne

pehna tha naya chooda

Ab unhi galiyon mein

phir se padaa hua hai kooda.

LS:Tere desh ki Ram-kahani sun

meri aankhon mein paani aa gaya

sadak ka kachra kooda chun chun

politicians ke maathe paani aa gaya

maathe ke paani koh click kar diya

phir cigarette ka butt flick kar diya :)))))

MNJ:Ab sun aaj ki aapbeeti

Hawa chal rahi thi meethi meethi

Chali sair ko Sanjay lake

Wahin speed ko lag gayi brake

Do din pehley thi durga puja

Kachra phailane ka bahana tha duja

Kagaz panni phool gulaal

Sabse hui lake maalamaal

Ab kachra ye kaun karey saaf

Devi maiyya hamein karein maaf

Kaho unsey koi chamatkaar dikhayein

Zara logon se kachra uthwa ke to dikhayein

LS: tu uss desh mein reheti hai

jis desh mein gandagi beheti hai

har nallah ek khula aangan hai

kooda bhi ab pyaara laagan hai!!

MNJ :socha duty samajh ke lag jayengey kaam pe

per laaton ke bhoot baaton se kahan maantey

Per dekh satta ki maaya

ik dhamki ne badli kaaya

aaj kuch to sukoon ka aalam hai

dekh bhai ummeed pe duniya kaayam hai!!!!

GTA :Ummed hai modi ji kuch kar payenge ,

logon ko kachra na phelane ki akal de payenge,

Jaise pardesh mai kachra phailane par hai manai,

jarmana bharne par hai zor lagai ,

LS: Kutte ki poochh kabhi seedhi hoti nahin

purani aadat aasani se chhoot-ti nahin

kanoon banaaye jaate hain tordne ke liye

rajneeti hoti hai sab koh nichordne ke liye

MNJ: Wahi Bharatwasi Singapore mein

kachra machaata nahin,

kyunki 500 dollar ka zaalim fine

uskey man ko bhaata nahin

jab hogi yahaan bhi aisi majboori

to karega kanoon ki her baat poori

LS: India mein fine police kha jayegi

gandagi phir bhi kahin nahi jayegi

ameer log kanoon koh tordenge

gareeb bechaare maare jayenge

MNJ: oho, phir to modi ji ko bolo

afsaron ke man saaf karein pehley

desh apney aap saaf ho jayega

varna chakravyooh mein Abhimanyu

phir ek baar phans jayega….!!

LS: abhimanyu nikale ya na nikle

humein chakravyuh tordna hoga

ab iss mushaira koh band kar

apna rukh kahin aur mordna hoga :))))))

Oct 10, 2014

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s